"Landa Paradisua” halaxe da, natura bere purutasunean: zelaiak, basoak, mendiak, tontorrak, arrokak, haranak, goi-lautadak, mendiguneak eta mendilerroak, edertasunean parekorik ez duten bi parke naturaletan egituratuak. Batetik, Aizkorri-Aratz, Euskadiko sabaia, Zegamatik abiatuta heltzen dena; Euskal Herri osoko gailurrik garaienetako bat du, Aizkorri (1.525 metro), lurralde osoaren ikuspegia eskaintzen diguna eskala errealeko mapa batean. Eta, bestetik, Aralar, Txindoki (1.033 metro) mendi bikainarekin, Gipuzkoako mendien irudi antzemangarrienetakoa.

Landa Paradisua baliteke izatea euskal kulturaren esentzia ondoen iraunarazi duen lurraldea. Eta baliteke bertako orografia menditsuagatik mantendu izana, belaunaldiz belaunaldi, euskara, Europako hizkuntzarik zaharrena, euskal ohiturak eta landa-inguruneko bizimodua, naturari sustraitua. Helmuga hobezina estresa, presak eta zarata atzean uzteko, eta paradisu berde txiki honetan murgiltzeko, non ardiak laztandu, baserritarrekin berriketan aritu eta ogia edo gazta eginez eskuak erabiltzeko aukera izango duzun.

Eskualde hau lehengaien, elikagai fresko eta sasoikoen supermerkatu antzeko bat da. Bazter guztietan topatuko dituzun baratze emankorrek kalitate goreneko ortuariak eta barazkiak eskaintzen dizkigute; belardietan patxadaz bazkatzen duen ganadutik dator haragirik onena eta goxoena, eta bertako baserrietan egiten dira, betiko ohiturei jarraituz, gazta, mamia, ogia, sagardoa, patea, eztia eta beste elikagai natural batzuk. Jaki horiek guztiak zuzenetik ikusi nahi badituzu merezi du Tolosako (larunbatetan) eta Ordiziako (asteazkenetan) azokak bisitatzeak. Ikusmira handikoentzat, museo gastronomiko ugari daude inguruan, D´elikatuz, Idiazabalgo Gaztaren Interpretazio Zentroa edo Tolosako Gorrotxategi Museoa, besteren artean.

Paseatu, ibili edo egin lasterka, nahi duzuna, baina hori bai, betiere mendian zehar. Leku aproposa duzu horretarako, seinaleztatuta dauden hainbat eta hainbat bide topatuko baitituzu, mendilerroen artean gurutzatzen direnak. Familia osoak gozatu ahal izango dituen ibilaldi ugari daude, mendiak inguratzen dituztenak, baita ibilbide luzeko (IL) bide-sare bat ere, (GR) bide zailagoak balizaz seinalatzen dituztenak, baita Espainiako aurreneko Trail estazioa ere, mendiko lasterketa zaleentzat eta mendi-ibiltari peto-petoentzat. Maila guztietarako ibiliak daude; beraz, jar itzazu zapatilak eta gozatu!