Atzealdea

Donostian galdu ezin dituzun txoko guzti-guztiak

Donostian galdu ezin dituzun txoko guzti-guztiak
Donostia

Donostian galdu ezin dituzun txoko guzti-guztiak

Donostia hiri txikia da, baina galdu ezin dituzun hainbat toki dauzka ezkutuan. Bisita errazteko, hainbat ibilbide prestatu dizkizugu, bertako kaleetan barrena ibiltzeko eta donostiarren esentziaz jabetzeko.

Ostirala Harresiak, kanoiak eta gotorlekuak, donostiarren altxorrik preziatuenak gordetzeko: pintxoak

Goiz partean, Urgull mendira igoko gara, hiriaren bihotzera. Donostiako hiru hondartzak batera ikusten diren hiriko toki bakarra da. Baina ez hori bakarrik, hantxe ikusiko ditugu hiriaren harresiaren aurriak eta kanoiak ere, hiriaren iragan militarraren lekuko. Ibilbide historikoa amaitzeko, Motako gaztelua bisita daiteke, baita Historiaren Etxea edo Ingelesen Hilerria ere.

 

Eguerdi partean, kaira jaitsiko gara, eta Alde Zaharreko kaleetan ibiliko pintxotan, miniaturazko sukaldaritzako plazerrak dastatzen. Bertatik bertara dugu, era berean, Bretxako azoka ere.

 

Sartu Konstituzio plazan, Alde Zaharreko bihotzean, eta asmatu zergatik ote dituzten zenbakiak bertako balkoiek.

 

Bazkalostean, kafetxo eder bat har daiteke Zuloaga plazako terrazetan. Hantxe dago San Telmo museoa, euskal kulturaren sekretuak bikain gordetzen dituen lekua. Arratsaldean, gune erromantikoan barrena ibiliko gara tipi-tapa; Kontxako hondartza iritsitakoan, arrimatu hango baranda ikonikora, eta ilunabar ahaztezina igaroko dugu. Eta, eguna ondo amaitzeko, itsasora ematen duen jatetxe bat bilatuko dugu, bapo afaltzeko. Hiru hondartza dituen hiri batean, ez da batere zaila!

Konstituzio Plaza

Larunbata Sei kilometroko kostaldea, hiru hondartza eta hiru ikono

Eguna hasteko modu bikain bat proposatzen dizuegu: 100 urte baino gehiago dituen funikularra hartu eta Igeldo mendira igotzea, hiriko ikuspegi panoramiko onenaz gozatzera. Beherakoan, ezin dugu galdu Donostiako ikonoetako bat: Haizearen Orrazia, mundu zabalean ospetsua den Eduardo Chillida artista donostiarrak sortua. Edertasun erabatekoaren adibide garbia, artearen eta paisaiaren arteko elkarrizketa sakona. Itsasoa zakar dabilenean, ezagutu olatuen efektua inguru magiko honetan!

 

Ondarretako lorategietan eta hondartzan paseatuz, Miramar jauregira iritsiko gara, errege familiaren garai bateko udako bizitokia. Inguruan dituen lorategiak toki bikaina dira paseoan erlaxatzeko edo hiriko zalapartatik atseden hartzeko.

 

Plan bikaina da Matia kalean donostiarrekin nahastea, Antigua auzoan, eta pintxo bikainak edo eguneko menu ederrak jatea. Bazkaria jaisteko, paseo atsegin bat egingo dugu Kontxako hondartza zeharkatuz, harik eta Aquariumera iritsi arte. Orain gutxi berritu zuten ia mende bat duen eraikin hori, eta Europako museo ozeanografiko modernoenetako bat da gaur egun. Euskal baleazaleen historia txundigarria kontatuko digute bertan.

 

Kostako ertzari jarraituz, Eraikuntza Hutsera iritsiko gara, Oteizaren eskultura horrek emango digu ongietorria Pasealeku Berriaren hasieran, eta, tipi-tapa, terrazaz, dendaz eta taberna xarmagarriz betetako Gros auzo ospetsura iritsiko gara. Pasealekua hirugarren hondartzarekin batera amaitzen da, eta, han, hirugarren eskultura topatuko dugu: Nestor Basterretxearen Bakearen Usoa. Ezin duzu ilunabarra galdu Sagueseko murruan, surflari eta skatelari gaztez inguraturik!

 

Eta, afaltzeko, Grosen sartuko gara, hiriko auzo dinamiko eta bohemioenean; hainbat eta hainbat jatetxe xarmagarri eta bereizgarri topatuko ditugu.

Igandea

Hiriko altxor arkitektonikoetan barneratzeko, ibilbidea itsasoan hasi eta Urumea ibaian gora joango gara, zubi zoragarriak igaroz. Lehendabiziko zubia Zurriolakoa da, eta, handik, Kursaaleko Moneoren kubo modernoak ikusiko ditugu alde batean (hondarretan geratutako bi arroka balira bezala), eta bestean, berriz, Belle Époque garaiko multzo ikusgarria, Victoria Eugenia antzokia eta bost izarreko Maria Cristina hotela.

Bigarren zubi parean (Santa Katalina), Equitativa izeneko eraikin arrazionalista-espresionista topatuko dugu ezkerretan, Gros auzoan sartzen denari ongietorria emanez. Frantzia pasealeku atseginean gora, jauregitxo dotoreen paretik igaroz, Maria Cristina zubira iritsiko gara. Eta, azkenean, Tabakalerara: garai bateko tabako fabrika, gaur egun kultura garaikideko zentro bilakatua.

Bertako erakusketaren bat bisitatu ostean –doakoak dira– edo terrazako ikuspegia miretsi eta gero, gomendatzen dugu Cristina Eneko 94.960 metroko koadroko parkean sartzea, beltxarga eta hegazterren artera.

Maria Cristina zubia gurutzatu eta hiriaren erdialdera iritsiko gara. Bilbo plazan irten, eta handik Koldo Mitxelena Kulturunera abiatuko gara, bai eta estilo ojibaleko Artzain Onaren katedralera ere. Terraza ugari ditu buelta guztian zerbait jateko.

San Martin azokaren ingurua paregabea da erosketak egiteko denda supersofistikatuetan, lokal alternatiboetan eta etxe handien boutiqueetan.

Nautikoan bukatuko dugu ibilbidea: eraikin arrazionalista horrek kaian ainguratutako itsasontzi bat irudikatzen du. Ontziralekutik, itsasoan sartuko gara apurka-apurka. Bertantxe mirets dezakegu Donostiako ilunabarrik onenetako bat.

Eta, eguna gutiziatxo batekin amaitzeko, Michelin izardun jatetxeren batean hartu dezakegu tokia, edo Alde Zaharreko toki tradizionalen batean.

 

Zurriolako hondartza