Atzealdea

Dastatu itsasoa bertsio guztietan

Dastatu itsasoa bertsio guztietan

Dastatu itsasoa bertsio guztietan

Asteburu osoa kostaldetik irten ere egin gabe, erabateko gozamenenean. Hondartzak, moda, dibertsioa, natura gehiago, poteoa... Eta guztia parrila zaporearekin. Ezagutu ondoren, ez duzu handik irten nahiko.

Ostirala Erlaxatu itsaso aurrean

Ostiral iluntzean, asteburuari ekiteko, Euskadiko hondartzarik luzeeneko malekoira gerturatzea proposatzen dizuegu. Zarauzko hondartzak 2.500 metro luze ditu, eta ikuspegi zoragarriak. Oso ezaguna da mundu zabaleko surflarien artean. Pasealekua amaiezina da; izan ere, puntu horretatik Getariaraino joan daiteke tipi-tapa oinez, edo, Iñurritza pasabide berezitik barrena, Mollarrin agertuko gara –garai bateko mineralen kargalekua, ikuspegi apartekoak eskaintzen dituen parajea–. Ondoren, poteo giroaz gozatu ahalko duzue, gure kulturan ohikoa den moduan, erdialdeko kaleetan. Ostatu hartzeko, era guztietako eskaintza topatuko duzue eskualdea osatzen duten bost udalerrietako edozeinetan. Oso tarte txikiak daude herri batetik bestera; beraz, hautatu gehien gustatzen zaizuna eta arazorik gabe mugituko zara. Aukeran dituzu nekazaritza landetxeak, landa giroa gustatzen bazaizu. Eta hondartzatik gertuago egon nahi baduzu, berriz, hotelak, apartamentuak, pentsioak edo kanpinak dituzu, ia-ia itsasertzean bertan.

Larunbata

Zarautzen baldin bazaude eta goiz samar ekiten badiozu egunari, Zarauzko azoka bisitatu ahalko duzu: postuotan, bertako produktuak topatuko dituzu, inguruetako baserrietan landuak. Turismo tradizio handiko herri honen erdian dago azoka, merkataritza establezimendu ugariz inguratuta; hori horrela, makina bat bistari etortzen da uda partean, eskaintzen duen giroaz gozatzera. Ondoren, plan zoragarri bat proposatuko dizugu Zumaia aldean. Udalerri ezagun horretan, hainbat jarduera eta bisita gidatu egin daitezke Euskal Kostaldeko Geoparkearekin loturik. Santa Klara baserrian eskaintzen dira bisitok, Itzurungo hondartzako eta itsasertzeko ikuspegiarekin. Hala, baserriaren sekretuak ezagutuko dituzu, eta esperientzia bikaina biziko duzu bertako animaliekin. Bereziki didaktikoa eta atsegina da etxeko txikientzat. Horretaz gainera, eskualdeko produktuak dastatu ahalko dituzue; konparazio batera, baserriko esnea.

Zumaia

Larunbata Zumaian makina bat toki topatuko dituzu otordu ederrak egiteko: izan pintxotan ibiliz, izan jatetxe bateko jangelan eseririk.

Zumaiako herrigunea atzean utzi, olagarro eta kresal usainari adio esanez, eta Getaria alderantz abiatuko gara. Udalerri zoragarri horretara oinez irits liteke, Donejakue Bidetik barrena, baita autobusez edo autoz ere, itsaso ikuspegi bikainak dituen errepidean zehar. Getariak baditu bi pertsonaia handi, zigilu berezia ematen diotenak: Juan Sebastian Elkano eta Balenciaga joskina. Itsas giroko tradizioa, aktibo jarraitzen duen arrantzale portua, labirinto itxura hartzen duten kale estuak, txingar usaina nonahi hartzen dela... Getaria berebiziko bitxi gastronomikoa dugu, guztia ere txakolin tradizionalez bustia, zeina inguruan nonahi ageri zaizkigun mahastietatik lortzen baita. Gastronomia askotarikoa da eskualde osoan; dena den, parrila dugu nagusi itsas ondare gastronomikoan. Baina, jan-edanaz gozatzeaz gainera, bestelako jarduerak ere badira Getarian; konparazio batera, Cristóbal Balenciaga joskinari eskainitako museoa.

Igandea Orio eta Aia

Igande goizean, Orio izango dugu jomuga. Oria ibaia itsasoratzen den tokian altxatutako udalerri honetan, Donejakue Bideko erromes ugari topatuko dugu. Lehendabiziko egiten dizuegun proposamena zera da, uretako jarduera bat piraguan edo arraunean. Tradizio handiko kirola herri honetan. Bikain pasatuko duzue! Ahozurientzat, aholku bat: egundoko esperientzia da Bisigua Orioko erara prestatzen ikastea. Bi parrilari paregabek sekretu guztiak kontatuko dizkizuete bisigu eder askoa parrilan prestatzeko. Jakina, esperientzia amaitzeko, luxuzko dastatze bat. Oriotik abiatu eta Aiara iritsiko zara, errepide pintoresko batetik barrena. Aiako herrigune txikia baina xarmagarria ezagutu ondoren, Iturrarango Lorategi Botanikoa eta Agorregi burdinola proposatzen dizkizugu, Pagoetako parke naturalean.

Orio