Atzealdea

Gozatu paisaiaz, gastronomiaz, arteaz... apurka-apurka

Gozatu paisaiaz, gastronomiaz, arteaz... apurka-apurka

Gozatu paisaiaz, gastronomiaz, arteaz... apurka-apurka

Zer ezagutu ugari dago Debagoienean. Asteburu bat proposatzen dizugu, inguruotako natura, arkitektura eta herriak batere ez galtzeko. Guztiaren atzean, historia zoragarria topatuko duzu.

Ostirala Paisaia, tradizioak eta gastronomia. Geure-geurea dugun konbinazioa.

Arratsalde partean Aretxabaleta aldera iritsi, eta, hasteko eta behin, proposatzen dizugu paseotxo bat egitea Urkuluko urtegian: inguru natural eder askoa, Aizkorri-Aratz parke naturaleko sarreretako batean. Bira osoa eman diezaiokezu urtegiari, 7 kilometroz, edo bide irisgarria bakarrik egin, 805 m-koa. Sekulako esperientzia da bidea osorik kalesa batean osorik egitea (hitzordua hartu behar da aurrez). Oroitzeko moduko arratsaldea izango da. Eta, hegaztiak gustatzen bazaizkizu, hartu prismatikoak. Inguruotan hainbat aukera dituzu lotarako: Leintz-Gatzagako baso magikoko txabolak, Urkuluko urtegiko landetxea, Eskoriatzako landetxeak edo herrigunean dagoen ostatua. Aukera bereziak eta xarmaz beteak. Autentikotasunaren bermea. Gainera, herri hauetako edozeinetan topatuko dituzu bapo afaltzeko tokiak.

Urkulu

Larunbata Arantzazu eta Urbia. Arte garaikidea, euskal kultura eta natura bete-betea.

Larunbat goiza Arantzazuko santutegiko bisita gidatuarekin hasiko dugu. Aizkorri-Aratz parke naturalean sarturik, euskal arte garaikidearen adibide esanguratsuenetako bat dugu. Eduardo Chillida, Jorge Oteiza eta halako artisten lanak topatuko ditugu. Lehendabiziko aldia baduzu, txunditurik utziko zaitu santutegiak eta inguru guztiak. Santutegiaren ostean, Aizkorri-Aratz Parke Naturalaren Interpretazio Zentroa bisitatu ahalko duzue, baita Gomiztegi baserria ere (gaztandegi ez ezik, artzain eskola ere bada). Ibilbide zirkular irisgarria da, bi kilometro luzekoa, eta benetan merezi du. Segun eta zenbat gustatu zaizkizuen Arantzazu eta ingurumariok, erabaki beharko duzue santutegiaren inguruko jatetxeren batean bazkaldu edo Oñatirantz abiatu eta herrigune historikoko tokiren batean jan. Agian, mendizale amorratuek bazkaldurik izango dute Urbia gainean. Nolanahi ere den, on dagizuela!

Arantzazu

Larunbata Oñati eta Arrasate

Oñatiko herrigune historiko-artistikoan, Sancti Spiritus unibertsitateak, San Migel parrokiak eta Bidaurreta monasterioak merezi dute bisitatxo bat, eta, ibilaldiaren amaieran, Txokolatearen Interpretazio Zentrora joan gaitezke, “Txokolateixiara”, Oñatiko txokolate tradizioaren berri izatera. Arrasate euskal kooperatibismoaren sehaska dugu. Beheko ataritik edo Portalonetik abiatuta, hirigune historikoa zeharkatu behar dugu, eta Santa Barbara parkean zehar paseatu. Dragoi baten eskultura famatua dagoen parke honetatik, Erdi Aroko hiriaren ikuspegi ederra izango dugu. Horretaz gainera, terrazadun taberna ugari daude pintxo batzuk jateko. Merkataritza eskaintza ere ugaria da. Kanpamentu nagusia aldatzea erabaki baduzue igandeko jomugetatik gertuago egoteko, Oñatin, Arrasaten, Bergaran edo Elgetan barra-barra dira xarmadun hotelak, apartamentuak eta landa-ostatuak. Autokarabanaz bidaiatuz gero, berriz, hainbat puntu dituzue geratzeko.

Igandea Ibilaldi historikoak, gozokiak, Km0 produktuak, zientzia... Gehiago eskatzerik?

Elgetan ekingo diogu igandeari. Tipi-tapa ibilbide gidatu bat egingo dugu Intxorta mendian; bertan, 1936-37ko gerra garaian gertatutakoen berri izango dugu. Elgeta Gipuzkoa eta Bizkaiaren arteko mugan dago, landa auzo txikiz inguratutako gaintxo batean. Ibilaldiaren ostean, herriko plaza toki apartekoa da hamaiketako txiki bat egiteko. Debagoieneko bisita amaitzeko, ezinbestekoa da Bergarako herrigune historiko-artistikoa bisitatzea, etxez eta jauregiz josia. Halaber, probatu beharrekoak dira bertako barrubeteak, tostoiak eta Wolfram goxo berritzailea. Horretaz gainera, Errekalde jauregiko Laboratorium museoa bisitatu dezakegu, zientziaren gune historiko izendatua. Izan ere, Bergarako Errege Seminarioaren laborategietan elementu kimiko berri bat aurkitu zuten: wolframioa.