Atzealdea

Ibili tipi-tapa “Basque Highlands” aldean, eta hartu arnasa sakon

Ibili tipi-tapa “Basque Highlands” aldean, eta hartu arnasa sakon

Ibili tipi-tapa “Basque Highlands” aldean, eta hartu arnasa sakon

Goierri ihesaldi bikaina da autentikotasuna maite dutenentzat. Mendi parajeok ia-ia magikoak dira. Goierri Gipuzkoa barnealdean kokaturik dago. Oraindik ere gehiegi ezagutzen ez den paraje errustiko hau paregabea da mendi bueltak egiteko eta gastronomia tradizionalaz gozatzeko.

Ostirala Patxada ala kale giroa? Zeuk erabaki

Goierrira ostiral arratsaldean iritsiz gero, bi gauza behintzat egin ditzakezu.

 

  • Ostatura joan eta patxadaz, paisaiaz, familia giroaz eta gastronomiaz gozatu. Eskualde honetako edozer herri txikitan daude baserri bikainak, lasai asko lo egiteko. Haietako batzuek ostatuaz gainera sagardotegia ere badute.
  • Baina sar zaitezke herririk animatuenetako kaleetan ere. Beasainen, Ordizian edo Seguran poteo giro ederra topatuko duzu. Beasain aukeratu baldin baduzu, berriz, hotel zoragarri bat duzu Igartza Monumentu Multzoan. Egunez zoragarria bada, gauez maitemindu egingo zaitu! Segura da Euskadiko osoan ondoen kontserbatuta dagoen Erdi Aroko herria. Han ere aukera ederrak dituzu ostatu hartzeko. Kalerik kale zabiltzala, herriko plazan agertuko zara. Inguru hartantxe egoten da giroa. Eta Ordizia aukeratu baduzu, berriz, azoka egiten duten inguruetan taberna onak daude zerbait hartzeko, azokan bertan eskuratutako produktuekin lagunduta. Horixe bai dela km0!

Larunbata Idiazabal gazta eta San Adriango tunela, konbinazio paregabea.

Gazta ona gustatzen bazaizu, Idiazabal Gaztaren Interpretazio Zentroa bisitatu behar duzu inolako zalantzarik gabe, mundu osoko gaztarik onenetako bat baita. Idiazabalen egiazko gaztandegiak ere bisitatu ahalko dituzu. Arkumetxorik baldin bada, txikiek izugarri gozatuko dute, eta, gazta egiteko garaian joanez gero, sekretu guztiak ikasiko dituzue, sagardo eta txakolin dastatzeekin batera. Bestalde, Goierri aldera joan eta San Adriango tunela ez zeharkatzea (Karlos V.a enperadoreak egin zuen moduan) esperientzia berdingabe bat galtzea da. Igoera bi ordu ingurukoa da, samurra oso. Ondo seinaleztaturik dago eta ikuspegi zoragarriak eskaintzen ditu. Hartu erreferentzia gisa Zegama udalerria eta Aizkorri-Aratz parke naturala. Ibilbidea osorik egin daiteke, edo autoa Aldaolako aparkalekuan utzi eta hogei bat minutuz ibilita. Goiz partean egindako txango honek goseturik utziko zaitu, eta toki zinez autentiko bat gomendatzen dizugu: Otsaurte gainean, txorizo, odolki edo haragi egosi pintxo zoragarriak dituzu zain. Eta horrekin ase ezean, indaba jana da beste aukera bikain bat.

Idiazabal

Larunbata Arratsaldean, jolastu eta dibertitu haurren pare!

Umeekin joaten bazara, bazkalondoan Anduetza parketxera joan zaitezke orientazio jokoan aritzera. Plan biribil-biribila (uztailetik aurrera). Hiru zirkuitu daude, zailtasun maila desberdinekin. 7-8 urtetik aurrera, haurrek orientazioaz gozatu ahalko dute, gurasoek erraz kontrolatzeko moduko toki mugatu batean, eta haiek ere parte har dezakete, gainera. Eta, iluntze partean, berriro ere galdera bera izango dugu: patxada ala kale giroa? Berdin du. Edozer aukeratzen duzula ere, apustu segurua da.

Igandea Aralar parke naturala: artzainen eta izaki mitologikoen lurra

Aralar parke naturala da Goierri aldeko esentzia. Iganderako plan ezin hobea. Artzainen eta izaki mitologikoen lurrean, tontor ederrak ageri dira, Txindoki, konparazio batera (Euskal Herriko Cervino deitua), baina baita megalitoak, Euskadiko pagadi handienetako bat edo mendi larre zabalak ere, ardi latxak nonahi ageri direla... Guztia ere Lizarrustiko parketxetik iristeko moduan (uztailetik aurrera). José Ramón Aguirre izango duzu zain paraje hartan (Marron deitzen diete guztiek), kastako mendizale bat, Mongolian, Pakistanen eta Nepalen espediziotan ibilia.

Igandea Mitologiaren aitaren etxea

Lizarrustiko parketxera igo aurretik, Ataunen geratzea gomendatzen dizugu. Sara baserria ezagutuko duzu, Jose Migel Barandiaranen etxea, euskal kulturako gizon sonatua bera. Apaiz eta ikastun hark erabat aldatu zuen euskal historiaurreari buruzko jakintza, eta euskal mitologia berreskuratu zuen. Sara baserritik, Ataunen barrena ibilaldi txiki polit bat egin, eta Barandiaran museora iritsiko gara: euskaldunon unibertso magikoan murgilduko gara. Ezkutaturik dauden bitxi horietako bat da... Ipar Euskal Herriko baserri etxeen grazia guztia gordetzen du, ipuin batean bezala. Doan bisita daiteke. Goierritik kanpoko euskaldun askok eta askok ez dute ezagutu ere egiten, eta XVI. mendeko errota batean dago.

Igandea Paseo klasiko bat Lareo aldera

Lizarrusti parketxetik abiatzen den ibilbide zoragarri bat, 6,7 km luzekoa. Bideak apenas du desnibelik, eta pagadi bat, bidezidor eder bat, erreka eta sakan bat igaro, eta Lareoko urtegi ederrean irtengo gara. Baina hori aukera bat baino ez da; izan ere, Aralarrek 260 kilometro luze ditu bidezidorretan, eta sei ibilbide, guztiak ere Aralarko parketxetik abiaturik. Euskal Herrian mendi ibilirako tokirik berezienetako batean gaude: 6.000 urte inguruko mendilerro bat, 117 espezie eta 11 habitat babesturekin. Gainera, ondo-ondoan du Nafarroa!

Aralar

Igandea Tirolinak gosea pizteko

Lizarrustiko abentura parkea egundokoa da! Parketxean bertan dago, eta monitoreek lagunduko dizute tirolinetatik bota eta zubi tibetarra igarotzen. Ondoren, hortxe bertan, berriro ere indarrak hartu ahal izango dituzue, sasoiko produktuekin prestaturiko otordu bikainarekin: indabak neguan, alkatxofak eta onddoak udaberrian, edo, bestela, indaba jana (bertako indabak eta herriko harategian egindako artisau odolkia). Uda partean, berriz, inguruko baratzeetako tomate entsalada, leka freskoak eta entsalada errusiarra, goxo-goxoa. Ez dira inoiz falta izaten arkumea txilindronean, txahal muturra eta saiheskia. Eta, amaitzeko, ez ahaztu mamia dastatzeaz. (Uztailetik urrira, egunero irekitzen dute, astelehenetan izan ezik.)