Atzealdea

Edozeren bila ari zarela ere, hementxe topatuko duzu

Edozeren bila ari zarela ere, hementxe topatuko duzu

Edozeren bila ari zarela ere, hementxe topatuko duzu

Tolosaldea eskualde zoragarria, autentikoa eta berezia da, Tolosa herria buru duela. Bertako produktuaren sehaska; giro paregabea izaten da eguneko ordu guztietan, eta tradizio kultural handiko herriak ditu inguruan. Hori guztia dela eta, pozarren ibiliko gara bisitaldi honetan.

Ostirala Murgildu berdetasunak ematen duen baretasunean

Ziurrenik naturatik gertu dagoen tokiren bat hautatuko zenuen gaua igarotzeko, mendiz inguratuta. Horregatik, zera gomendatzen dizugu iristen zarenean, hartu arnasa sakon, begiratu mendiei, eta, inguruan gaztandegi edo sagardotegiren bat baldin badago, joan lasai-lasai eta gozatu paraje natural eta autentiko horiez. Disfrutatu zentzumen guztiekin: hartu zerbait bertakoak elkartzen diren tokian, afaldu bapo eta egin lagun herritarrekin. Lotarako, edonon dela ere, asmatuko zenuen, seguru: makina bat landetxe daude, eta guztietan ere bakea eta aire garbia dira nagusi. Diseinuzko hotelak ere bai gusturik finak asetzeko, edo apartamentuak, beren kasa ibili nahi dutenentzat. Taldean doazenek, berriz, aterpetxeak ere topatuko dituzte. Era guztietako planak asetzeko ostatuak, baina guztiak tratu gertuko eta etxetiarrarekin.

Larunbata Azoka eguna. Ez dakizu zer-nolako azoka!

Larunbat goizetan, pronto duzu plana Tolosaldean: erosketa eguna da. Lehendabiziko bisita bertako ekoizleen azoka da, Zerkausian egiten dute. Eta zentzumen guztiak adi behar ditugu, bisita zoragarri hau gozatu ahal izateko. Bezperan baratzetik bildutako barazkiak ikusiko ditugu, freskotasuna darien kolore eta testurarekin. Artzain gaztak usainduko ditugu: Idiazabal, urdina, ahuntz gazta... Zati txiki bat hartu probatzeko, eta ekoizlearen azalpenek lagunduko digute erabakia hartzen. Handik Berdura plazara joango gara. Loreek, landareek eta kimuek edertasun berezia hartzen dute, espazioak berak lagunduta. Kristalen plaza ere deitzen diote inguru horri, eraikineko teilatuari erreferentzia eginez. Tolosako herrigune historikoan guztia. Artea eta historia interesatzen bazaizkizu, joan dudarik gabe turismo bulegora, eta eskatu Tolosako herrigune historikoa edo larunbatetako azoka ezagutzeko bisita gidatuak; bisitatu daiteke gidarekin Santa Maria eliza ere, euskal gotikoaren adibide bikaina. Guztiak zoratzen irteten dira, izan behar du zerbait... Bazkalordua iristear dugu, eta zer toki hoberik! Tolosako babarrunak, Ibarrako piperrak eta sakramentu guztiak: egundoko ahogozagarria eskualdeko edozer ostatu edo jatetxetan gozatzeko. Okelazaleek, berriz, txuleta bikain bat jan dezakete Tolosako erretegiren batean. Plan biribila gourmet peto-petoentzat.

 

Larunbata Etxeko txikien eta oraindik ere ilusioa gordetzen dugunon ordua.

Tolosan, funtsezkoa da Topic museoa bisitatzea, Txotxongiloen Nazioarteko Zentroa. Erreferente da Europan, eta harriturik uzten ditu bisitariak originaltasunagatik, berrikuntzagatik eta irudimenagatik. Irribarrez irteten dira bisitari guztiak, handi zein txiki. Inolako zalantzarik gabe, ilusioari irekitako liburu bat da Topic! Kaleetan barrena gabiltzala, ezingo dugu saihestu erakusleihoek gure begirada erakartzea. Kalitate handiko merkatari txikiz gainezka dago alde zaharra. Tolosan egindako Elosegi txapela da oroigarri bikain bat: ikono kultural hori egokitzen-egokitzen joan da, eta kolore guztietako bertsio modernoak eskaintzen ditu. Oroigarri goxoak dira, halaber, Eceizaeneko teilak eta zigarrotxoak, edo Rafa Gorrotxategiren gorrotxak. Eta, egunaren amaieran, sekulako giroa izaten da Tolosan, bai poteorako, bai pintxotan ibiltzeko. Gildak nahitaez probatu beharrekoak dira hemen; izan ere, eskualde honetakoa da pintxo tradizional honen osagai nagusietako bat: Ibarrako piperra. Baina askoz ere gehiago dago. Inguru hauetan, denboraldiko produktua da jatetxe eta pintxo tabernetako produktu izarra, bai tradizionaletan, bai prestaketa berritzaileagoetan.

Igandea Lilura, kultura, paisaia eta abentura, zein baino zein. Sekulako plana!

Igande goizean naturara irtengo gara, eta Tolosa eskualde buruaren inguruan dauden herri txikiak ezagutzera. Donostiako norantzan, Alkiza eta Asteasu topatuko ditugu. Alkizan, artea maite dutenek Urmara aire zabaleko eskultura museoa topatuko dute, Koldobika Jauregirena. Horretaz gainera, naturazaleek hainbat ibilbide dituzte hemen aukeran, baita Hernio-Gazume Interpretazio Zentroa ere, babes bereziko eremu izendatua. Apur bat aurrerago, Asteasun, literaturazaleek edo, beste helburu jakinik gabe, herri pintoresko batean ibilalditxo bat egin nahi dutenek Muskerraren Bidea egin ahalko dute, Bernardo Atxagaren Obabakoak eleberrian oinarrituta –udalerri horretan jaioa baita Atxaga–. Vitoria-Gasteizerako norantzan, Alegiako irteera hartuta, Altzoko Handia ezagutzea proposatzen dizuegu. Joakin Migel Elizegi Altzoko Ipintza baserrian sortu zen, eta gigantismoa izan zuen. Bizitza harrigarria izan zuen. Huraxe izan zen Handia filmaren inspirazio, zeina Oscar sarietarako hautatu baitzuten. Erraldoiaz harago, larre berde-berdez osaturiko paisaiak topatuko ditugu, han-hemenka baserriz zipriztinduta. Merezi du Altzo aldera bisitan joatea. Amezketara doan bideari helduta, tontor handi batek harrituko gaitu. Txindoki mendia da, Aralarko parke naturaleko gainik altuena. Igande goiza denez, meza nagusia amaitu ondoren, Amezketako San Bartolome elizara sartu ahalko gara. Altxor handi bat topatuko dugu bertan: argizaiolak. Gure egunetara arte eutsi diote hemen aspaldiko tradizio horri. Familia bakoitzak eserleku bat izaten du arbasoen hilobien gainean, baita argizaiola bat ere –hots, kandela bat bilduta duen egurrezko pieza landua–. Gomendatzen dugu bideari jarraitzea eta Abaltzisketara igotzea, eta, handik, Larraitz auzora: Aralarko parke naturaleko sarrera nagusia. Txindokiko Itzala izeneko abentura zentro bat dago bertan: orientazio jokoak, mendi ibiliak, abentura basoa, haur parkea eta 3 km-ko ibilaldi irisgarria ditu. Baita tirolina bat ere! Zer hoberik asteburua zoriontsu amaitzeko, eta, gainera, ausartetan ausartena sentituz!