Atzealdea

Sartu Gipuzkoa barnealdeko magian

Sartu Gipuzkoa barnealdeko magian

Sartu Gipuzkoa barnealdeko magian

Urola Garaiak harriturik utziko zaitu, espero ez zenuen bezala harritu ere. Esperientzia aberasgarria biziko duzu: natura, poteo giroa, Joxe Mari Iparragirre abeslariaren historia, Burdin Haranaren muina eta Igartubeiti baserria.

Ostirala

Ziurrenik, zerbait desberdina bisitatu nahian zabiltza, baina iruditzen zaizu ikusita daukazula inguruan duzun guztia. Ez baituzu ezagutzen Gipuzkoako eskualderik txikiena: Urola Garaia. “Serendipia” leloak dioen bezala, presta zaitez harriturik geratzeko eta espero gabeko parajeak ezagutzeko.

 

Komeni da ostiralean hastea, pilak kargatzeko moduko toki batean. Igo Antiguako ermita ingurura. Bertantxe goza dezakezu ilunabarraz, Beloki mendiaren bueltan paseo txiki bat egin bitartean, natura bete-betean. Eta, jaisten zarenean, ermitak ahoa bete hortz utziko zaitu. Parerik gabeko edertasuna du barrualdean, eta harriaren eta zuraren arteko konbinazioa da nabarmenena.

 

Bisita osatzeko, gomendatzen dugu Antiguako Interpretazio Zentroa bisitatzea (bertantxe dago eskualdeko turismo bulegoa ere): ermitari eta Zumarragari buruzko informazio gehiago eskuratuko duzu.

 

Eguna amaitzeko, mugakide duen Urretxura joango gara, poteoan aritzera. Alde zahar liluragarri hartantxe jaio zen Joxe Mari Iparragirre, euskal abeslari ospetsua. Hari eta udalerriari buruz zerbait gehiago jakitera animatzen bazarete, proposatzen dugu Iparragirreren irudia duten plakei jarraitzea eta QR kodea eskaneatzea. Ipini martxan irudimena haren abestiekin eta kontakizunekin... Horretaz gainera, Iparragirreren bigarren mendeurrena dela eta, astebururako agenda kontsultatzea gomendatzen dizugu; izan ere, baliteke 2020rako programatutako jarduera ugarietakoren bat egokitzea.

 

Lotarako, hainbat eta hainbat aukera dira: landetxeak edo apartamentu modernoak, naturaz inguraturik. Baita hiri hotelak edo xarmadun pentsioak ere.

Antiguako ermita

Larunbata

Zer modu hoberik egunari ekiteko, Zumarragako azoka bisitatzea baino. Oraindik orain berritu dute azoka, eta bertatik bertara izango dituzu euskal ekoizleak, bertako baserritarrak, probatzeko irrikaz zauden produktu horien gaineko argibideak emateko prest. Baratzetik ekarri berriak ez ezik, baserriko ogia, eztia, gazta edo arrautzak ere topatuko dituzu, besteak beste.

 

Paseatzea eta giroaz gozatzea gustatzen baldin bazaizu, egun bikaina da Zumarraga aldean ibiltzeko eta zerbait hartzeko bertako taberna eta kafetegietan.

 

Albo-alboan dagoen Urretxu udalerrian, merezi du Santa Barbara auzoa bisitatzea; izan ere, aukera ugari eskaintzen du: Irimo mendira igo edo bestelako paseoren bat egin, Aikur ezti museoa bisitatu, Ipeñarrieta jauregi ikusgarriari argazkiak atera ardi latxak larrean ari diren bitartean, edo kafetxo bat hartu ermitaren alboan dagoen jatetxe-taberna-ostatuan, seme-alabak merenderoko zabuetan jolasean ari diren bitartean. Ez al da sekulako plana?

 

Arratsalde partean, Ezkioko Igartubeiti baserria ezagutu dezakegu. Bisita saihetsezina bilakatu da. Berdin du familiarekin zoazen, bakarrik edo lagunduta. XVI. mendeko dolare baserri honek ez du inor axolagabe uzten. Baserri hau bakarra da inguru guztian, eta gela denak bisitatu daitezke, garai hartako baserri bat zer-nolakoa zen ikusteko.

 

Ondoren, animatu herriaren goiko aldera igotzera, hiru minutura: Ezkiok bere-berea duen landa-giro autentikoa biziko duzu. Zoratzen esango diozu agur herriari, batez ere bertako gastronomia dastatzen baduzu jatetxeren batean. Guztietan topatuko duzu Km0 produktuekin prestatutako gastronomia. Haietako batzuk, gainera, gure landaguneetako ikonoak dira: ostatuak. Zer moduzko tankera hartzen diozu?

Igandea

Igandean Legazpi bisitatuko dugu: bikain kontserbatutako industria ondarea ikusiko dugu han. Mirandaolako Burdinola da bertako bitxia: nekez ahaztuko duzun zuzeneko ikuskizun batekin ipintzen dute martxan. Txunditurik geratuko zara hauspo erraldoiekin, edota ikustean zer nolako indarrez kolpatzen duten burdina gori-goria mailuekin. (argazkia)

 

Eguna osatzeko, Lenbur fundazioak antolatutako bisitaldiren bat egin dezakezu: Langileen Ibilbidea edo Igaralde errotako bisita, zeinean zeure opila egiteko aukera izango baituzu. Plan itzela familiarekin partekatzeko!

 

Atzera indarrak hartzeko, hainbat taberna eta jatetxe daude Legazpiko herrigunean, pintxoak eta errazioak dastatzeko edo jatetxeren batean lasai-lasai eseri eta jateko. Igande eguerdian giro polita egoten da, bertako guztiak bermuta hartuz. Zer gehiago eska liteke asteburua amaitzeko?